Sdang ka 7th Elite Men’s National Boxing Championship ha Shillong

Sdang ka 7th Elite Men’s National Boxing Championship ha Shillong

Shillong, Naiwieng 25: Ka rynsan iakura jong ka 7th Elite Men’s National Boxing Championship ka la sdang ha ka sngi Saitjaiñ ha SAI Indoor Hall kaba ha NEHU.

Kane ka rynsan iakura kaba don haduh 41 tylli ki bout na ki 13 tylli ki kyrdan ialehkai hynne ka sngi. Ia kane ka lympung kaba la sdang ha ka 25 tarik bad ban kut ha ka 1 tarik u Nohprah, la pynlong da ka Meghalaya Boxing Association (MBA) bad ka BFI ha ryngkat ka jingkyrshan lang da ka tnat Sports and Youth Affairs, jong ka Sorkar Jylla, la plied a u Secretary General ka Boxing Federation of India (BFI), Shri Hemanta Kumar Kalita kum u kongsan.

Ha kane ka sngi sdang la iadon lang u Working President ka Meghalaya State Olympic Association, u bah John F Kharshiing kum u symbud kongsan, ha ryngkat ka jingiadon lang ka Director ka tnat Sports and Youth Affairs ka Kong Isawanda Laloo IAS, u General Secretary ka MSOA Bah Finely L Pariat, u Assistant Director ka SAI Shillong u PS Chauhan bad u President ka Assam Boxing Association u Kamal Goyary.

Kumba ka paw ka nongbah Shillong ka la ju pynlong ia kum kine ki lympung ialehkai kiba heh ha ki snem kiba la leit kum ka North East Olympic Games 2022, National Ranking Archery Tournament 2023 bad ka Senior National Table Tennis Championship 2022.

Haba ai jingkren ha kane ka sngi, ka Kong Laloo ka la long ba ka long ka burom ia ka Jylla hi baroh kawei ban pynlong ia kum kane ka lympung. “Ngi sngwkmen eh ba ka BFI bad ka MBA na ka bynta ka jingiatrei lang ban pynlong ia kane ka lympung ialehkai. Ha kajuh ka por ka long ka kabu ksiar na ka bynta jong ngi ym tag ban pynlong ia kane ka lympung bad ban iohi ia ki sap ialehkai jong ki khlur iakura na kylleng jong ka ri, hynrei ba ki rangiakura ka Jylla kin ioh ban pyni ia la ki sap ki jong ki bad ba kin nangkiew shaphrang ha ka kam ialehkai.”

“Ki don shibun ki sap iakura napoh ka Jylla bad mynta ki la nangbun lyngba ka jingtrei shitom ka MBA ha kaba ki la ioh ban iashim bynta ha ki zonal bad regional, “ ka la bynrap.

Ka Kong Laloo ka la ai burom sha ki coach kum u Bah Torak Kharpran bad ka Roshni Bhusal, kiba mynta ki la long kum ki coach ban ai jinghikai ia ki nongiakura jong ka ri. Na ka liang ki bor pyniaid ki la pynkut burom ia ki ha kane ka sngi plie ia kane ka lympung.

Shuh shuh ka Director ka la pynpaw ba na ka liang ka Sorkar Jylla lem bad ka BFI ki la soi ia ka memorandum of understanding (MoU) na ka bynta ban kyntiew ia ka boxing ha kane ka jylla. Ka la pynpaw ruh shaphang ka Elite Pathway Programme ia kaba la iatrei lang bad ka MSOA na ka bynta ban ithuh ia ki sap ialehkai.

“Nga khmih lynti ba kane ka lympung ka long ka jingiarap ban nangsei ia ki sap ialehkai jong ki khynnah. Ki samla ialehkai jong ngi kin nangioh mynsiem lyngba kane ka lympung ialehkai,” la ong ka Kong Laloo da kaba bynrap, “Nga khmih lynti ban iohi ia kiba bun ki rangiakura ba kin ioh rung sha ka Paris Olympics ka ban long ha u snem ban wan.”

U Bah Kharshiing ha ka jingkren ka jong u, u la ong ba lyngba ka jingioh ban pynlong ia kum kine k lympung ka long ka jingiarap ia ka Jylla ba kan nanglah ban pynmih ia ki nongiakura ki ban paw hapoh ka ri lem bad kiwei ki jingialehkai.

Ha kawei pat ka liang u Kalita u la ai khublei ia u Myntri Rangbah ka Sorkar Jylla u Conrad K Sangma lem bad ia ka Sorkar ka jong u na ka bynta kane ka lympung.

Ha kane ka lympung ki la don haduh 398 ngut ki rangiakura na ki 37 tylli ki jylla, union territory bad kumjuh na ki sports board.

“Kane ka long ka lympung ialehkai kaba kongsan na ka bynta jong phi. Ki nongjop ki ban khur tang ha kane ka lympung kin ioh rung sha ki prokram kilanmet jong ka ri bad kito ki rangiakura kiba kynsai kin ioh ban leeit Italy na ka bynta ka lympung iakura rung sha ka Olympic.”

Ha kane ka sngi ki rangiakura ka ri ki la ioh ban kiew rynsan ha kane ka lympng.

U Banjop Nongkhlaw (51-54kg bantamweight) u la shah rem da ka knockout ha u Mohammed Bilal of Telangana tang ha ka wat kaba nyngkomg, kumjuh u Balnas Sangma u la iakynduh pyrshah ia u rangiakura na Goa u Nikhil Gaonkar, ha kaba u la shah rem ha ka 67-71kg light middleweight bout. Kawei pat ka jingiakhun ka la long hapdeng u Justerwell Jyrwa ha ka middleweight 71-75kg pyrshah ia u Abhishek Shaw uba na Bengal.

Kane ka lympung ialehkai kan bteng biang ha ka sngi U Blei ha kaba kan sdang naduh ka por 11 baje mynstep.


Discover more from shillongtoday.com

Subscribe to get the latest posts sent to your email.