MIH KI RANGBAH, LONGKMIE BAD KI SAMLA KA SHNONG MAWTNENG BAN PYNKHUID IAKA WAH UMTUNG

MIH KI RANGBAH, LONGKMIE BAD KI SAMLA KA SHNONG MAWTNENG BAN PYNKHUID IAKA WAH UMTUNG

Nongpoh 4 Jymmang 2024: Ka jingdon jong ki nongialam shnong ban ialam ia u paidbah shnong ban ieid iaka sawdong sawkun lane iaki jingdon jingem jong ka mariang ka long kaba bha tam eh ha kine ki sngi kiba mynta namar ka jingdon jong kiba bun ki pyrshang ban leh dusmon iaka mariang, la ka dei haka jingleh jaboh, ka jingthang klumar iaki khlaw ki btap, ka jingpyniap dusmon iaki mrad khlaw, ki sim ki doh bad kumta terter.

 

Kawei ka nuksa kaba bha eh ha kane ka sngi ka dei ka jingmih jong ki paidbah shnong ka shnong Mawtneng haka District Ri Bhoi ban pynkhuid ia kawei ka wah kaba iaid lyngba kane ka shnong ia kaba la tip kum ka wah Umtung da ka jingbuh iaka jingsngewkhia kaba ki la iathuh ba ki don tang kane kawei ka wah kaba iaid lyngba ka shnong jong ki kaba la ai iaka jingkyrshan iaki jingthung jingtep jong ki khamtam iaki pynthor kba jong ki. Bad ka jingdon jong ki briew kiba pyrshang ban ber bih na ka bynta ka jingmyntoi ban kem doh hynrei khlem pyrkhat iaka jingduhjait ki dohum, nangta ka jingpynjaboh da kaba bret iaki tiar bym pyut kum ki bilor, ki plastic bad kiwei kiwei ka pynsniew ym tang iaka dur jong ka wah hynrei ka pynsniew ruh iaka jingbha jong ka um na kane ka wah

 

Da ka jingmih paidbah ki nongshongshnong ha kane ka sngi ki la buh ruh iaka jingkyntu bad ka khubor ka ban long ka nuksa ia kiwei ba kim dei ban pynjaboh ia kano kano ka wah lane leh dusmon iaki dohum dohwah namar haba u Blei u buh iaki jingthaw jong u ki don la ka bynta ban pynbha iaka mei mariang bad ki sawdong sawkun jong ka

 

Haba ioh ban iakren bad u Rangbah Shnong ka Shnong Mawtneng u Bah Fosterbest Sohiong bad I Kong Thwilibon Barim iba dei I Secretary ka Seng Longkmie Pyllun ka Shnong Mawtneng ki la ong ba ka jingmynjur jong ki paidbah shnong ban pdiang iaka hukum jong ka Dorbar Shnong ban iamih paidbah ban pynkhuid ia kane ka wah ka long ban pynneh pynsah iaka jinglah jong ki nongshongshnong ban pyndonkam ia kane ka wah la ka dei haka sum ka sait ne ka saitjain saitnep lane wat ha kaban pyndonkam haki pynthor haba rep kba lane rep jhur.


Discover more from shillongtoday.com

Subscribe to get the latest posts to your email.