La leit ba tep donburom iaka met basah jong u Bah Kyrmen Lyngdoh Nonglait

La leit ba tep donburom iaka met basah jong u Bah Kyrmen Lyngdoh Nonglait

Nongpoh, Jymmang 14: Ki paidbah shnong jong ka shnong Erpakon ha Ri Bhoi District ryngkat ka Balang Presbyterian Erpakon haka jingiadonlang jong ki bahaing hasem ki la leit ba tep donburom iaka met basah jong u Bah Kyrmen Lyngdoh Nonglait u rangbah uba la suba shah pyniap ha uwei u bar jylla uba trei bylla ha kawei ka dukan bam kaba la tip kum ka RN Sharma Hotel kaba don ha katei hi ka shnong ia uba la ithuh kyrteng kum u Raju.

Iaka met ba sah jong u Bah Kyrmen Lyngdoh Nonglait la leit ban tep ha u Lum jingtep jong ka Balang Presbyterian Erpakon hadien ka jingaibor jong ka Balang Presbyterian Raibah ban pyndep ia ka jinglehniam ba khadduh bad tep ha u Lum Jingtep jong ka Balang Presbyterian Erpakon namar utei u Bah Kyrmen ryngkat ka ing ka sem ki dang don kyrteng Balang haka Balang Presbyterian ha Raibah ha West Khasi Hills District namar ki la pyndep iaka jingiathoh shongkurim ha katei ka Balang Raibah kaba dei ka shnong jong ka Kong Kismilinda Snaitang hynrei mynta lah katto katne snem ki la wansah noh haka shnong Erpakon kaba dei ka shnong jong u Bah Kyrmen Lyngdoh Nonglait.

Ha kane ka sngi tep bad lehniam khadduh iaka met jong u Bah Kyrmen LLyngdoh Nonglait kum ka jingpyni iaki dak ban pynrem halor ka jingshah pyniap jong utei u rangbah da u bar jylla uba wansah ha kane ka shnong tang kum u nongbylla, ka Seng Samla Shnong Erpakon da ka jingiashimbynta jong ki dkhot ki la leit synran naduh na ingsah haduh u lum jingtep ryngkat ka jingrah da ki lama iong bad ki placard kiba la thoh da ki kyntien ban pynrem ia utei u bar jylla bad ki kyntien ban kyntu iaki bor sorkar lyngba ka tnat ba dei ban pynshitom tyngeh ia utei u Raju uba la nud ban leh ia katei ka kam.

Haba ai jingkren haka por ba pynlong iaka jingiaseng duwai ha ingsah jong u Bah Kyrmen Lyngdoh Nonglait shwa ban rah iaka met sha lum jingtep na ka liang jong u Bah Michael Thongni uba dei u rangbah shnong u la ong da kaba kyntu iaki paid ka bri u 7 trep ban long noh kiba husiar, namar ki briew kiba wan na ka jylla aiu re ki la sdang ban leh donbor ha kylleng ka bri u 7 trep, da kaba bynrap ruh ba kiwei ki shnong ki lah ban pyrkhat ba ka Dorbar Shnong Erpakon ka jem ki kyndon ain shnong ban teh lakam iaki jingsniew bad ka jingwan jong ki briew kiba nabar hynrei namar ka kam ban pyndep iaka met basah jong une u rangbah kam pat dep kumta u la ong ba ka Dorbar Shnong ka don la ka bynta ban pyndep la ka kamram da kaba kyntu iaki kynhun bapher bapher ban ai ka jingkyrshan iaka Dorbar Shnong ha kaba iadei bad kane ka kam.

Kane ka jingsdang jong ki briew bar jylla ban leh ia kine ki kam pyniap iaki trai jylla ka la nang iai jia ha Ri Bhoi District. Lah ban pynkynmaw ba 2 snem mynshwa kata haka 26 tarik u Nailur 2022, uwei u bar jylla u la pyniap ia kawei ka samla lud kaba dang 19 snem ka rta haka shnong Pahamsyiem Nongpoh kaba dei na ka Shnong Iewmawlong kaba la ong ba ka don jingiadei bad une u bar jylla kumba 5 bnai eiei hashwa katei ka jingshah pyniap

Haba iakren bad ki nongialam jong ka Seng Samla Shnong ki la pynpaw iaka jingbitar hynrei kim lah ban shim iaka ain haka mon jong ki hynrei ki la buh pat da ka jingkyntu ba ki bor pulit kin ai iaka jingbishar kaba hok bad ka jingpynsaja ia utei u nongleh kam bymman.

Kumban shu pynkynmaw ba ia u Bah Kyrmen Lyngdoh Nonglait la suba ba u shah pyniap ha uwei u bar jylla ia uba la ithuh kyrteng kum u Raju uba trei ha kawei ka dukan bam ka don ha katei ka shnong haka miet jong ka 11 tarik u Jymmang 2024 ha kawei ka lynti shnong jong katei hi ka shnong bad la lap iaka met jong u na katei hi ka jaka kaba u shah shoh,  da ki briew shnong kiba iaid lynti ha katei hi ka miet. Ki bahaing hasem ki la buh da ka ejahar ha Thanad Nongpoh bad na ka liang jong ki pulit ki la kem ia utei u Raju bad ki dang pynlong iaka jingtohkit bad ban leh ia kaba donkam.


Discover more from shillongtoday.com

Subscribe to get the latest posts to your email.