HASHWA KA LUR LYNGKHA BAD THUNGKBA, PYNSUM MASI KA RAID NONGKHARAI KUM KA LEHNIAM HA KANE KA RAID

HASHWA KA LUR LYNGKHA BAD THUNGKBA, PYNSUM MASI KA RAID NONGKHARAI KUM KA LEHNIAM HA KANE KA RAID

Nongpoh, 7 Jymmang: Ka jingnang ialeh jong ki nongialam Raid ban pynneh pynsah iaka jinghikai u mynbarim da kaba pyrshang ban bteng iaka lehniam ka leh rukom ka dei ka jingpynim bad pynneh iaka riti ka dustur, ka niam ka rukom ka ktien ka thylliej bad kiei kiei kiba long tynrai kiba hikai u longshwa u manshwa.

Ha Ri Bhoi District kaba dei kawei na ki District kaba ki nongshongshnong ki dei kiba im haka rep ka riang bad ka khyndew ka ailad bha ban thung ban tep namar ka jingsboh jong ka, ki nongrep ruh ki kmen ban thung ban tep bad ban nangbteng iaka rukom trei rukom ktah jong u longshwa manshwa bad ruh ban nang pynneh iaka lehniam leh rukom haman la ki aiom rep, la ka dei hashwa ka thung ka tep, ka bet symbai, ka lur lyngkha, ka ot ka lum bad kiwei kiwei.

HASHWA KA LUR LYNGKHA BAD THUNGKBA, PYNSUM MASI KA RAID NONGKHARAI KUM KA LEHNIAM HA KANE KA RAID

Haka 6 tarik u Jymmang 2024, ka Raid Nongkharai ha Ri Bhoi District kaba dang hap hapoh ka jingpeit jingkhmih jong u Syiem ka Hima Mylliem ka la pyndep iaka lehniam kaba la tip ka lehniam Pynsum Masi, kaba lah ban pynkynmaw ba kane ka Raid Nongkharai ka ju leh man la u snem hashwa ki nongrep kin hiar sha ki pynthor kba na ka bynta ban thung ban tep kum ka jingpan jingkyrpad ban beh iaka sniew ka smeh bad ka nguh ka dem sha u Nongbuh Nongthaw ban kyrkhu iaka rep ka riang ha ka snem baroh shisnem.

Ha kane ka Lehniam Pynsum Masi haka Raid Nongkharai ha Ri Bhoi District la pynlong haka jingialam jong u Lyngdoh ka Raid Nongkharai u Bah Mikhel Timung ryngkat ki Longsan ki Mansan na kane ka Raid, ha kaba la wan ban sakhilang ha kane ka sngi da u Bah Robertjune Kharjarin uba dei u Legal Adviser barim ka KHADC haka jingiadonlang ruh ki Myntri U Syiem ka Hima Mylliem, U Basan ka Hima Mylliem U Bah Natheniel Nongkseh, nangta ki Nongialam na ka Raid Nongkharai, ki Rangbah Shnong na ki Shnong ba marjan, U Bah Rocky Marwein, ki riew rangbah, ki longkmie, ki samla nalor kiwei pat.

Nalor ka lehniam leh rukom kaba dei ka duwai ka phirat bad ka pynsum masi kaba la ialam da u Rangbah Nongknia kane ka thain uba dei na ka Kur Bey, la pynbud sa ia kiwei ki jingleh niam kiba kynthup iaki jingshad tynrai kiba kynthup iaka shad dohmahi, ka shad mastieh kaba la iashimbynta da ki samla kynthei bad shynrang.


Discover more from shillongtoday.com

Subscribe to get the latest posts to your email.